Ба гузориши Радиои Озодӣ, Пайвандони Маҳмадалӣ Ҳайит, узви зиндонии Ҳизби Наҳзати Исломии Тоҷикистон, мегӯянд, ҳафт моҳ боз дар бораи дар чӣ вазъ будани ӯ хабар надоранд ва барои «ёфтанаш» аз 11 созмони байнулмилалӣ мадад хостаанд.
Мансурҷон Умаров, сардори Сарраёсати иҷрои ҷазои ҷиноии Вазорати адлияи Тоҷикистон, рӯзи 19-уми январ ба Радиои Озодӣ гуфт: “Маҳмадалӣ Ҳайит зиндаву саломат аст ва ҳеч мушкил надорад. Агар, Худо нахоста, фавтад ё бемор шавад, ба наздиконаш хабар медиҳем… Пас аз шаш моҳи дигар, бо расидани муҳлати навбатии мулоқот, бо наздиконаш дидор мекунад. Вай на дучори омикрон шудааст ва на зуком. Саломат аст.”
Маҳмадалӣ Ҳайит, муовини раиси Ҳизби Наҳзати Исломии Тоҷикистон, соли 2016 дар як мурофиаи паси дарҳои баста ба ҳабси умрбод маҳкум шудааст. Ӯ ва наздиконаш ҳукми додгоҳро беасос ва дорои ангезаҳои сиёсӣ медонанд.
Гурӯҳи кории Созмони Милали Муттаҳид соли 2018 боздошти Ҳайитро ғайриқонунӣ дониста, аз ҳукумати Тоҷикистон хост, ӯро бе ягон қайду шарт ва фавран озод кунад.
БгиДега 